مدارس اسلامیہ میں عصری تعلیم کتنی کیسے اور کیوں؟

مدارس ، مکاتب، اسکولز ،کالجز،یونیور سیٹیز کے طلبہ پر کس طرح کے کام کی ضرورت ہے؟

امت مسلمہ موجودہ حالات میں کیا کرے؟

            ۱- مدارس اسلامیہ کو مضبوط کرنے کی علما بھرپور کوشش کریں، اس طور پر کہ تعلیمی معیاراور طریقہٴ تعلیم کی جانب خاص توجہ دی جائے؛ حالات کامقابلہ کرنے کے لیے طلبہ کو بھرپور انداز میں تیار کیا جائے ۔سب سے پہلے انہیں عربی و دینی علوم میں پختہ کرنے کی ہر ممکن کوشش کی جائے، ساتھ ہی تربیت کی جانب خاص توجہ دی جائے، موبائل سے طلبہ کو دور رکھا جائے اور تزکیہٴ نفس پر آمادہ کیا جائے؛ اس لیے کہ علم ِدین کتنا ہی ہو، اگر نفس کا تزکیہ نہیں تو بجائے اصلاح کے افساد کا اندیشہ زیادہ ہے اور عالم اگر فتنہ پروری پر اتر آئے تو اس سے زیادہ معاشرہ کے لیے اور کوئی نقصان دہ نہیں ہوتا ۔ اسی لیے حدیث میں ہے:

             عن الأحوص بن حکیم، عن أبیہ قال: سأل رجل النبی صلی اللہ علیہ وسلم عن الشر فقال:لا تسألونی عن الشر، واسألونی عن الخیر، یقولہا ثلاثا ثم قال: ألا إن شر الشر، شرار العلماء، وإن خیر الخیر، خیار العلماء۔

 (سنن دارمی باب: التوبیخ لمن یطلب العلم لغیر اللہ (حدیث رقم: 382)

            حضرت احوص بن حکیم اپنے والد حکیم سے روایت کرتے ہیں کہ ایک شخص نے رسول اللہ صلی اللہ علیہ وسلم سے شر کے بارے میں سوال کیا تو آپ صلی اللہ علیہ وسلم نے تین مرتبہ دوہراتے ہوئے ارشاد فرمایا:

             ”مجھ سے شر کے بارے میں سوال نہ کیا کرو،بل کہ خیر کے بارے میں پوچھتے رہو“، اس کے بعد فرمایا:”بدترین شر علما کا شر ہے اور بہترین خیر بھی علماہی میں ہے۔“

             یعنی عالم اگر درست، سب کچھ درست؛ عالم اگر بگڑا تو بیڑا ہی غرق ہوجاتا ہے۔ اس بات کی آپ صلی اللہ علیہ وسلم نے دوسری جگہ مزید وضاحت فرمائی۔

             عنہ صلی اللَّہ علیہ وآلہ- لَمّا سُئلَ عَن شَرِّ النّاسِ -: العُلَماءُ إذا فَسَدوا“.علما جب بگڑ جائے تو ان سے برا کوئی نہیں ۔

            حضرت علی سے بھی جب دریافت کیا گیا کہ انسانی معاشرہ کا بہترین طبقہ کونسا ہے؟تو کہا علما جب صلاح کے حامل ہوں۔

             اور پوچھا گیا ابلیس فرعون اور نمرود کے بعد سب سے بدترین کون لوگ ہوسکتے ہیں؟ تو آپ نے کہا علما جب فساد کا شکار ہوجائیں، اس لیے وہی حقائق کو لوگوں سے چھپاکر اور باطل کو مزین کرکے پیش کرتے ہیں ۔

            لہٰذا طلبہٴ مدارس کی تربیت کی جانب خاص توجہ ہونی چا ہیے۔

            قال الطیبی: إنما کانوا شر الشر وخیر الخیر ،لأنہم سبب لصلاح العالم وفسادہ، وإلیہا تنتمی أمور الدین والدنیا، وبہم الحل والعقد اہ. أو لأن عذاب شرارہم فی العقبی شر العقاب، ومراتب خیارہم فی المنازل الجنة خیر مآب۔

            علامہ طیبی رحمہ اللہ فرماتے ہیں کہ علما کو فساد و اصلاح کی جڑ قرار دیاگیا، اس لیے کہ فسادِ عالم اور صلاحِ عالم کا مدار علما ہی ہے، سارے معاملات کا انجام دینا اور حل کرنا انہی پر موقوف ہوتا ہے، دینی و دنیوی تمام امور کی باگ ڈور انہیں کے ہاتھ میں ہوتی ہے، اسی لیے جہنم میں سخت عذاب بھی علمائے سوء کو ہوگا اور جنت میں اعلیٰ درجہ پر بھی مخلص علما فائز ہوں گے۔

            ۲- امت کے ہر طبقہ میں گھس کر علما کو کام کرنے کی سخت ضرورت ہے، لہٰذا بعض ایسے ہوں جو دینی ِعلم اور اسلامی فکر میں تصلب اور مہارت کے ساتھ انگریزی لکھنے بولنے پر قادر ہوں؛ تاکہ جو بڑا طبقہ انگریزی کا دلدادہ ہے ان پرمضبوطی کے ساتھ موٴثرانداز میں دعوت کا کام کرسکیں، بعض دیگر علاقائی زبان کے ماہر ہوں، بعض عالمی دوسری زبان پر دسترس رکھتے ہوں؛ تاکہ کوئی میدان ہماری کوشش سے چھوٹنے نہ پائے۔

            ۳ – درجہٴ مشکوة اور دورہ کے طلبہ کو فرقِ باطلہ، ادیانِ باطلہ، افکار ِزائغہ ،مادی و مغربی تھذیب، الحادی افکار، محاسن ِاسلام، علم ِکلام جدید، دشمنوں کی سازشوں سے، اسلامی صحیح تاریخ سے، حضارة اسلامیہ، حاضر العالم الاسلامی، مقاصد ِشریعت ،اسرار و حکم شریعت، دعوت کے موٴثر طریقے، تربیتِ اسلامیہ ،علومِ اسلامیہ کی تدریس کے طریقے، مرتد مسلمان جو ایکس مسلم کے نام سے کام کررہے ہیں، ان کے اسلام پر اعتراضات کے جوابات، ہندتو وا کے اعتراضات کے جوابات، مستشرقین سے متعلق تفصیلات اور جدید تجارتی وفقہی مسائل وغیرہ مضامین کو بہترین انداز میں پڑھایا جائے ؛تاکہ خوب اعتماد کے ساتھ میدان میں اتریں۔

            ۴- طلبہ میں کتابوں کے مطالعہ کا شوق پیداکرنے کی سخت ضرورت ہے کہ وہ ہمارے اکابرین کی اردو عربی کتابیں خوب پڑھیں، اس لیے کہ مطالعہ کے ذوق کے بغیر کسی بھی معاشرہ میں موٴثر کام ناممکن ہے۔ اساتذہ کی ذمہ داری ہے کہ وہ خود بھی مطالعہ کثرت سے کریں اور طلبہ کی بھی رہبری فرمائیں ۔

            (۱) …صبر و استقامت کے پیکر۔ صفحات من صبر العلماء۔

            (۲)…وقت کی اہمیت۔ قیمة الزمن عند العلماء۔

            (۳)…متاعِ وقت و کاروان علم۔

            (۴)…آداب المتعلمین۔

            (۵)…العلماء العذاب الذین آثروا العلم علی الزواج ۔

            (۶)…تحفة العلماء ۔

            طلبہ کے درمیان یہ کتابیں اور ان جیسی دیگر کتابوں کی تعلیم کروائی جائے ،یا طلبہ کو ابتدائی مرحلہ میں ان کتابوں کے مطالعہ کا مکلف کریں ؛تاکہ ذوق بیدار ہو۔ کتب خانوں میں جانے کا عادی بنائیں، ہر مسجد میں دینی تعلیم کے کتب خانے قائم کریں ،ہر فردِ امت مطالعہ کا دیوانہ ہو، اس کی مکمل کوشش ہونی چاہیے۔ گویا” مطالعہ کلچر“ زندہ کیا جائے ؛جیساکہ اسلام کے عروج کے دور میں تھا، ”اسلامی علوم کی ڈیجیٹل دنیا“ مضمون کا مطالعہ اس پر روشنی ڈالتا ہے، اس کو پڑھیں۔

            ۵- طلبہ کو سائنسی معلومات اس طور پر دی جائے کہ وہ سائنسی حیرت انگیز معلومات کے ذریعہ اللہ کی قدرت کی معرفت حاصل کریں اور اس جانب انسانیت کو متوجہ کریں، جس الحاد کوسائنس کے ذریعہ عام کیا گیاہے،اسی سائنس سے اللہ کی عظمت کو بھی عام کیا جاسکتا ہے۔ مثلاً:

             DNA کیا ہے؟

            دماغ میں Neuron کیسے کام کرتے ہیں؟

             انسان کی دماغی صلاحیت کا تعارف؟

            دل کیسے کام کرتا ہے؟

            بچہ ماں کے پیٹ میں کیسے پرورش پاتا ہے؟

            قرآنِ کریم میں مذکور جانور، کیڑے مکوڑے کے بارے میں جو حیران کن سائنسی معلومات ہیں؛ مچھر، مکھی، ہدہد، چیونٹی، زمین، چاند، سورج، ستارے اور کہکشاں کے محیر العقول انکشافات وغیرہ؛ تاکہ طلبہ کے لیے یہ چیزیں اللہ کی خالقیت کو سمجھانے میں معین ہوسکیں۔

مدارس کے طلبہ کے لیے پرائمری سیکنڈری کا نصاب کیسا ہونا چاہیے؟

            ۶ – پرائمری، سیکنڈری، ہائی سیکنڈری کا نصاب اس طور پر تیار کیا جائے کہ اس میں سائنسی ، تاریخی، معاشرتی ، اقتصادی، سیاسی معلومات، اسکولی نصاب میں جو ہے، وہ بھی مختصراً ہو اور ساتھ ساتھ حقائق اور اسلام سے متصادم چیزوں کی بھی نشاندہی ہو؛ تاکہ طالب علم ڈنکے کی چوٹ پر چھاتی ٹھوک کر کسی کے بھی سامنے اس کی تردید کرسکے، گو داعیانہ اسلوب ہو۔ جیسا نصاب ہے ویسا پڑھا کر کوئی فائدہ نہیں، یہ تو مفید ہونے کے بجائے مضر ہوگا! اس لیے اس پہلو کو ملحوظ رکھنا ہمارے مدارس کے بنیادی مقاصد کے پیش نظر ازحد ضروری ہے۔

            ۷- طلبہ کو اسلامی اخلاق پڑھایا جائے، اس پر عمل درآمد کرنے کی شکل بنائی جائے، اس لیے کہ اخلاق کے بغیر دعوت اور معاشرہ پر اثر ناممکنات میں سے ہے۔

            ۸ – طلبہ میں لکھنے بولنے اور ڈیبیٹ کرنے کی صلاحیت کو پروان چڑھانے کے بارے میں سنجیدگی کے ساتھ سوچا جائے، تاکہ تقریر و خطابت اور سوشل میڈیا پر دعوت اور دفاع کے لیے افراد تیار ہوسکیں۔

            ۹- طلبہ کو صحافت ، قانون، دستور اور ملک کے مختلف نظاموں کی بنیادی معلومات سے دی جائے۔ مثلاً:

             نیوز کیسے تیار کیا جائے؟

             دستور اور ملک کا قانون کیا ہے؟

             ریل کا نظام، ٹیکس کا نظام، پولیس کا نظام اور پارلیمنٹ کا نظام ۔ یہ سب بھی پڑھایا جائے؛ تاکہ جس ملک میں ہیں اس کے قوانین و نظام سے مکمل واقفیت ہو۔

            ۱۰ – عالمی منظر نامہ بھی طلبہ کے سامنے آنا چاہیے ۔

             دنیا کی بڑی طاقتیں کون ہیں؟

             وہ کیوں بڑی ہیں؟

             مستقبل کی ٹیکنالوجی کیا ہوگی؟

             عالمی مالی میڈیائی ادارے کیسے کام کرتے ہیں؟! ان کا مقابلہ کیسے کیاجائے؟ تاکہ طلبہ گھبرائے بغیر جرأت و ہمت ،حوصلہ اور کانفیڈنس کے ساتھ میدان عمل میں اتریں ۔

            ۱۱- مکاتب کو مؤثر بنانا سب سے اہم ہے۔ اس کے نصاب کو اس طور پر تیار کیا جانا چاہیے کہ بچہ اسکول میں کوئی غلط موضوع پڑھنے سے پہلے اس کا صحیح اسلامی پہلو پڑھ لے، تاکہ وہ غلط چیز اس پر اثر انداز نہ ہونے پائے مثلاً :

            ”ڈاروین“ کی تھیوری تیسری کتاب میں پڑھنے سے پہلے، اس کا رد اور اسلام کا مستحکم نظریہٴ تخلیق، اس طور پر پڑھ اور جان لے کہ بچہ خود ہی اسے غلط قرار دے دے۔

            ۱۲- مسلمان اپنے اسکولس، کالجز اور یونیورسٹیز اپنے علاقوں میں تعمیر کرنے کی مہم چلائیں۔ شادیوں میں اچھے کھانیں،ڈکوریشن اور فیشن؛ اسی طرح سیر و تفریح پر فضول خرچی نہ کرتے ہوئے دوسروں پر ڈیپینڈ ہونے کے بجائے خود قائم کریں اور اس میں اسلامی ماحول کی بھرپور سعی کریں، ان اسکولوں میں دین کی بنیادی تعلیم کا معقول انتظام کریں، تاکہ ہمارے بچے غیروں کے گندے ماحول کے بجائے اپنے پاکیزہ ماحول میں تعلیم حاصل کریں۔ الحمدللہ عصری تعلیم دینی ماحول کی بہترین مثال ”جامعہ اکل کوا“ ہے۔

            ۱۳ – اسکول اور مدارس کے اساتذہ کے لیے وقتاً فوقتاً تربیتی ورکشاپ رکھے جائیں، جس میں فکرمندی کے ساتھ موٴثر طریقوں کی تعلیم دی جائے ۔

            ۱۴- مسلمان والدین کو اسلامی تربیت اور اپنے گھر کو اسلامی ماحول کا حامل کیسے بنایا جائے؟ اس پر ورک شاپ رکھے جائیں، اس لیے کہ سب سے بڑا رول ماحول ہی کا ہوتا ہے۔ عربی میں کہتے ہیں : ”الام تصنع الامة“ کہ مائیں ہی عمدہ امتوں کو وجود بخشتی ہیں ۔

            ۱۵ – نیک اولاد آنکھوں کی ٹھنڈک ہے، اس کے لیے والدین صالحین سے مربوط رہیں، گھر میں دینی تعلیم کے لیے اچھی کتاب کا انتخاب واہتمام کریں، خود والدین نیک بنیں، نماز، روزہ، حج اور عمرہ کا اہتمام کریں۔ گالی گلوچ، میاں بیوی کے آپسی جھگڑوں سے دور رہیں۔

            بچوں سے پیار کریں، انہیں پُر اعتماد بنائیں، حوصلہ دیں ،بددعا نہ دیں طعنہ نہ دیں، ذلیل نہ کریں، ان کو وقت دیں، ان کی باتیں سنیں، ان پر اعتماد کریں، انہیں بزرگوں اور سلف ِصالحین کے واقعات سنائیں، مجرموں کے بارے میں بھی بتائیں، پچھلی امت کے ہلاکت کے وجوہات سے واقف کریں، بداعمالی اور بداخلاقی کے انجامِ بد پر مطلع کریں، اس کی سخت ضرورت ہے۔

            ۱۶ – بروں کی صحبت سب سے ہلاکت خیز ہے، لہٰذا اپنے بچوں پر مکمل نظر رکھیں کہ وہ کسی برے دوست کے ساتھ تو نہیں رہتا ۔ والدین خود بھی بے نمازی ، بداخلاق افراد سے دور رہیں، اپنے بچوں کے سامنے فلم بینی، کرکیٹ، سیریل وغیرہ دیکھنے سے کلی اجتناب برتیں؛ ورنہ بچوں پر آپ کی نصیحت کا اثر نہیں ہوگا۔

            ۱۷ – فیشن کی وبا سے دور رہیں۔ خاص طور پر ماں میک اپ، تنگ لباس سے بچے۔ اور ماں باپ دونوں پُرلذت کھانے اور عیش وعشرت کی زندگی کے بجائے جفاکشی کو اختیار کریں؛ تاکہ بچے بھی دیکھ کر ویسی ہی زندگی گزاریں اور ہر طرح کے حالات کے لیے تیار رہیں۔

            ۱۸ – سیرتِ رسولﷺ کی کسی اچھی کتاب کی تعلیم گھر میں ضرور ہونی چاہیے، تاکہ اس کے مطابق زندگی گزار سکیں۔ ” اسوہٴ رسول اکرم“ﷺ( ڈاکٹر عبدالحئی رحمہ اللہ) بہت مفید ہوگی یا کوئی بھی اچھی کتاب۔

            ۱۹- گھر میں قرآنِ کریم کی تلاوت کا ہر ایک کو عادی بنایا جائے، ہوسکے تو قرآن کی تفسیر بھی کرے، اس لیے کے قرآن ہی تمام انسانی مسائل کا صحیح حل پیش کرتا ہے۔

وہ زمانہ میں معزز تھے مسلماں ہوکر

اور ہم ذلیل و خوار ہوئے تارکِ قراں ہو کر