بلا ضرورت اُستادوں کا بدلنا اچھی بات نہیں، حضرت مولانا اشرف علی تھانویؒ کا واقعہ:
فرمایا: بارباراُستادوں کا بدلنا کوئی اچھی بات نہیں۔ آج کل طلبہ کوجو فیض نہیں ہوتا اُس کی بڑی وجہ یہ بھی ہے کہ: استاد بدلتے پھرتے ہیں کبھی کسی اُستاد کے پاس اورکبھی کسی اُستاد کے پاس، نہ ادھر کے رہے نہ اُدھر کے۔ حضرت مولانا اشرف علی تھانویؒ ایک اُستاد سے حفظ کیا کرتے تھے۔حضرت مولانا اشرف علی تھانوی رحمۃ اللہ علیہ کے والد صاحب کا خیال ہوا کہ: استاد بدل دینا چاہیے، بجائے اُن کے کسی اورسے حفظ کرایا جائے۔ حضرتؒ کو جب اس کا علم ہوا توبہت رنجیدہ ہوئے، گھر پہنچے اس رنج وغم کی وجہ سے کھانا بھی نہیں کھایا۔ حضرت مولانا اشرف علی تھانویؒ کے کھانا نہ کھانے کی وجہ سے اُن کی چچی جوحضرت ؒ کو بہت چاہتی تھیں اُنہوں نے بھی کھانا نہیں کھایا۔ حضرت مولانا اشرف علی تھانوی ؒ کے والد صاحب جب گھر تشریف لائے ،جب اُن کو یہ حال معلوم ہوا توفوراً اپنا ارادہ بدل دیا اوراُن ہی اُستاد کو باقی رکھا۔ حضرت مولانا اشرف علی تھانویؒ کو اس سے بے حد خوشی ہوئی۔ جب اپنے اُستاد سے اس درجہ تعلق تھا، دل میں عظمت اورقدرتھی تب بنے ہیں’’ حضرت تھانویؒ‘‘۔ اُستاد کی قدروعظمت کی وجہ سے اللہ نے کتنا نوازا اورکتنا دین کا کام لیا ہے؟ حضرت مولانا اشرف علی تھانوی ؒ یوں ہی ’’تھانوی‘‘ نہیں بن گئے پہلے کچھ کیا ہے پھردیکھو کیسے عالَم کوچمکایا ہے؟!! میں توکہتا ہوں کہ: کوئی صحیح معنی میں طالب علم بن کرتورہے پھر دیکھو! اللہ تعالیٰ اس کو کیسے نوازتے ہیں؟!! (۲۳؍ ذی الحجہ ۱۴۰۵ھ)
ادب و احترام کی کمی محرومی کا باعث ہے:
فرمایا: اس کی کیا وجہ ہے کہ: جو نصاب اورجوکتابیں پہلے پڑھائی جاتی تھیں، اب بھی داخلِ درس ہیں، لیکن اب کتابوں کو پڑھ کرایسے افراد تیار نہیں ہوتے، جس طرح ان ہی کتابوں کو پڑھ کر پہلے تیار ہوا کرتے تھے؟ نہ تو اُن میں علمی پختگی اوراستعداد ہوتی ہے اورنہ ان کی عملی زندگی درست ہوتی ہے، جس کی وجہ سے وہ بالکل نکمّے کسی کام کے نہیں رہتے۔
جہاں اس کے بہت سے اسباب ہیں ایک بڑا سبب اس کا یہ بھی ہے کہ: لوگ اساتذہ کا ادب واحترام نہیں کرتے، اس کی وجہ سے محروم کے محروم رہتے ہیں۔ لوگ ان باتوں کو معمولی سمجھتے ہیں حال آں کہ ان ہی جیسے اعمال سے لوگ نہ معلوم کہاں سے کہاں پہنچ گئے؟!! سب کچھ ’’ہدایہ‘‘ اور’’ جلالین‘‘ ہی سے نہیں ہوتا، کتابوں کی طرح ایک اہم سبق اسا تذہ کا ادب اوران کی خدمت بھی تو ہے۔ علم کی طرح دیگر فضائل و کمالات مثلاً’’ حسنِ اخلاق‘‘ وغیرہ حاصل ہونا بھی تو ضروری ہے جو بزرگوں کی خدمت میں رہ کر حاصل ہوتے ہیں۔ جب یہ باتیں بھی ضروری ہیں توپھرآخر کیوں ان سب چیزوں کے حاصل کرنے کی کوشش نہیں کی جاتی؟ کیوں اُس طرف سے غفلت اور بے تو جہی برتی جاتی ہے؟
استاد کی خدمت نہ کرنا بھی محرومی کا ایک سبب ہے:
فرمایا: دوسروں سے خدمت لینے سے حتی الامکان احتراز کرنا چاہیے، اب وہ مزاج ہی نہیں رہا کہ طلبہ خوشی سے خدمت کریں۔ اِلَّا مَا شَائَ اللّٰہ! اب خدمت لینے کا جذبہ توہوتا ہے، لیکن خدمت کرنے کا جذ بہ نہیں ہوتا، اس لیے محرومی عام ہوتی جارہی ہے۔ محرومی کے بہت سے اسباب ہیں اُن میں سے ایک سبب یہ بھی ہے کہ: استاد کی خدمت نہیں کرتے۔ دینے والی ذات تواللہ تعالی کی ہے، لیکن وہ ذریعہ اورواسطہ سے دیتا ہے اورکس کے دل میں اُستاد کی کتنی عظمت و محبت ہے ،اللہ خوب دلوں کا حال جانتا ہے۔
زمانۂ طالب علمی میں حضرتؒ کی خدمت کا حال:
زمانۂ طالب علمی میں میرا معمول تھا کہ: جمعہ کے روز تمام اساتذہ کے پاس جاتا تھا اورعرض کرتا کہ: حضرت! کچھ کام ہو تو فرمائیے، دھونے کے لیے کپڑے دے دیجیے، پوری زمانۂ طالب علمی میں میرا یہ معمول رہا اور حضرت ناظم صاحبؒ کا سارا کام میں کرتا تھا، وضو بھی میں کراتا، کمرہ کی صفائی بھی کرتا تھا، بستر میں بچھاتا تھا اور بازار سے سود الا تا تھا اورہاتھ پیربھی دباتا تھا اوراس کے ساتھ ساتھ محنت سے پڑھتا بھی تھا۔ کتنی مرتبہ ایسا ہوا کہ: میں بازارسودا لینے گیا اوربھرے بازار میں کھڑے کھڑے میں نے کتاب کا مطالعہ کیا ہے۔ حضرت ناظم صاحب ؒ کے پیردبانے کی طلبہ کی باری لگی تھی۔ جب دوسروں کی باری ہوتی میں کہہ دیتا کہ تم لوگ آرام کرو میں دبالوں گا، تم دباؤ گے تو مطالعہ کا نقصان ہو گا اورمیں ساتھ ساتھ مطالعہ بھی کرتا رہوں گا۔ اونچے تکیہ پرکتاب رکھ دیتا اورپیردبانے کے ساتھ کتاب بھی دیکھتا رہتا۔ زمانۂ طالب علمی میں جب میں چھوٹا تھا اپنے اُستادوں کے گھروں میں جاتا تھا اوراُن کے گھر کا پانی بھرتا تھا، گھر سے کھانا لانا، بازار سے سامان لانا سب میرے ذمہ تھا۔ مجھے اچھی طرح یاد ہے کہ: جب میں کانپورپڑھنے گیا تھا توبہت چھوٹا تھا اورگھر کا پانی نیچے سے اوپرزینہ پرچڑھ کر لے جانا پڑتا تھا، پانی لے کر او پر چڑھنا میرے لیے بہت مشکل ہوتا تھا۔ اُس زینہ میں ۲۲؍ سیڑھیاں تھیں، ایک سیڑھی چڑھتا تھا اوربیٹھ کرسستا تا تھا، پھر چڑھتا تھا۔ اس طرح میں نے اپنے اساتذہ کی خدمت کی ہے، لیکن ان سب کے باوجود میرا مزاج خدمت لینے کا نہیں ہے اورآج کل کوئی دل سے خدمت کرتا بھی نہیں ہے۔ اگر کسی سے کوئی کام کہ دیا جائے تو منہ بنانے لگتا ہے۔
اُستاد اور اُس کے متعلقین کا ادب حضرت شیخ الہندؒ کی حکایت :
فرمایا: استاد کا ادب بہت بڑی چیز ہے، اُس کے ادب سے علم میں ترقی ہوتی ہے۔ صرف استادہی کا نہیں ،بل کہ استاد کے متعلقین کا بھی ادب کرنا چاہیے، نیزاستاد کے نام کا بھی ادب کرنا چاہیے۔
ایک بزرگ کا حال لکھا ہے کہ: وہ لیٹے ہوئے تھے اُن کے سامنے اُن کے استاد کا نام لیا گیا فوراً اُٹھ کربیٹھ گئے اورفرمایا کہ: میرے استاد کا نام لیا جائے اورمیں اسی طرح لیٹارہوں۔
اوراُستاد کے متعلقین کا ادب کرنے کی بابت حضرت شیخ الہندؒ کا واقعہ بیان فرمایا کہ: حضرت شیخ الہندؒ نے جب سفر ِحج کا ارادہ فرمایا توروانگی سے قبل حضرت مولانا قاسم نانوتویؒ کی اہلیہ کی خدمت میں حاضر ہوئے (اُس وقت وہ بہت ضعیفہ ہو چکی تھیں) دہلیز کے پاس جا کر حضرت شیخ الہندؒ نےعرض کیا کہ: اماں جان! اپنی جوتیاں مجھے عنایت کیجیے، جوتیاں لے کرسرپررکھیں، دیر تک روتے رہے اور فرمایا کہ: اپنے اُستاد کا تو کما حقہ حق ادا نہیں کر سکا شاید میرا یہ عمل اس کو تاہی کی کچھ تلافی کر سکے۔ حضرت مولانا قاسم نانوتویؒ کی اہلیہ حضرت شیخ الہندؒ کی اُستاد نہ تھیں، لیکن اُستاد کے متعلقین میں سے تھیں یعنی اُستاد کی بیوی تھیں، اس لیے ان کا اس قدرادب ولحاظ کیا۔ پھر دیکھو! حضرت شیخ الہندؒ کو اللہ نے کیسا نوازا اور کتنا دین کا کام لیا ہے؟!! (۱۹، ذی الحجہ ۱۴۰۵ھ بعد عشاء)
استاد کی خدمت کا نتیجہ میں بادشاہت ملی:
فرمایا: صاحب’’ تعلیم المتعلم‘‘ لکھتے ہیں کہ: امام فخر الدین رازیؒ کو میں نے ’’مرو‘‘ میں بادشاہ کے پاس دیکھا کہ: بادشاہ اُن کی بہت تعظیم کرتا تھا اوریہ بات باربارکہا کرتا تھا کہ:
’’میں نے عزت وسلطنت محض اُستاد کی خدمت کے صلہ میں پائی ہے، کیوں کہ میں اپنے استاد قاضی ابوزید دبوسیؒ (جن کا نام ’’اصول الشاشی‘‘ میں آتا ہے تم لوگوں نے پڑھا بھی ہو گا یہ وہی ابوزید د بوسیؒ ہیں۔) کی بہت خدمت کیا کرتا تھا۔ یہاں تک کہ میں نے تیس سال تک متواتراُن کا کھانا پکایا اورکبھی بھی اُس میں سے نہیں کھایا، جب اُن کے تقویٰ کا یہ حال تھا تواُن کے انصاف کا کیا عالم رہا ہوگا؟!! دراصل ایسے ہی لوگ بادشاہت کے مستحق ہوتے ہیں۔
اُستاد کی خدمت کے صلہ میں بادشاہت ملی اورآخرت میں جو اجر ملے گا وہ الگ ہوگا۔ یہ اوصاف حاصل کرنے کے ہیں، ایسے اوصاف تم لوگ اپنے اندر پیدا کروکسی کی طرف نگاہ اُٹھا کربھی نہ دیکھو۔ اگرلاکھوں کی تھیلی بھی کوئی تمہارے سپرد کر دے اُس کوکھول کر بھی نہ دیکھو کہ: اس میں کیا ہے؟ اپنے کوبنانے کی کوشش کرو، کوشش کے بعد ہی آدمی کچھ بنتا ہے۔ اللہ تعالیٰ ہم سب کو توفیق نصیب فرمائے۔ (آمین) (۱۳؍ محرم الحرام ۱۴۰۵ھ)
اساتذہ کی خدمت سے متعلق چند واقعات:
حماد بن سلمہ ؒ کی ہمشیرہ عاتکہ فرماتی ہیں کہ: امام ابو حنیفہؒ ہمارے گھر کی روئی دھنتے تھے اوردودھ ترکاری خرید کرلاتے تھے اوراس طرح کے بہت سے کام کیا کرتے تھے۔
حمادؒ امام ابو حنیفہؒ کے اُستاد ہیں۔ اُس وقت کیا کوئی سمجھ سکتا تھا کہ حمادؒ کے گھرکا یہ خادم تمام عالَم کا مخدوم ہوگا؟!!
شیخ الاسلام حضرت مولانا سید حسین احمد مدنیؒ کے حالات میں لکھا ہے کہ: اُن کے اُستاد حضرت شیخ الہند مولانا محمود الحسن دیوبندیؒ کے یہاں مہمان زیادہ آگئے۔ بیت الخلا ایک ہی تھا مہمانوں کا قیام کئی دن رہا۔ حضرت مولانا سید حسین احمد مدنی ؒروزانہ رات کوآکربیت الخلا صاف کرجاتے اور صبح کوبیت الخلا صاف ملتا۔
ایک مرتبہ مولانا انظر شاہ کشمیریؒ پسرعلامہ انور شاہ کشمیری یہاں مدرسہ میں تشریف لائے تھے اورطلبہ کے سامنے تقریر فرمائی، جس میں واقعہ بیان کیا کہ: ایک بنگالی طالب علم ڈابھیل میں حضرت والد صاحبؒ کی خدمت کیا کرتا تھا، ذہن کے اعتبار سے بہت کمزورتھا، محنت بھی زیادہ نہ کی تھی، سب طلبہ سے کمزور رہتا تھا لیکن اللہ پاک نے اُس سے دین کی بڑی خدمت لی۔ اس وقت اپنے علاقہ کے ’’شیخ الاسلام‘‘ ہیں۔ سفر حج میں اُن سے ملاقات ہوئی تو فرمایا: یہ سب حضرت شاہ صاحب ؒ کی خدمت کا ثمرہ ہے۔
میرے ایک ساتھی قاری رحیم بخش صاحب، حضرت قاری فتح محمد پانی پتیؒ کی بہت خدمت کیا کرتے تھے، ذہین تھے مگر پڑھنے میں زیادہ محنت نہیں کرتے تھے، دورۂ حدیث تک میں دوسرے طلبہ کی طرح انہوں نے محنت نہیں کی تھی، لیکن اُستاد کی خدمت کا نتیجہ ہے کہ: اس وقت ملتان کے مدرسہ میں ممتاز مدرس کی حیثیت سے ہیں اورکئی کتابوں کے مصنف ہیں۔
میرے ’’پانی پت‘‘ کے زمانۂ طالب علمی میں عزیزی حافظ سید نعمت اللہ صاحب اپنے اساتذہ کی بڑی خدمت کرتے تھے، اُن کے اعزا واقارب کے کام کرنے میں بھی کبھی دریغ نہ کرتے تھے؛ چوں کہ کم عمر تھے اوردیانت دار تھے اس لیے محلہ کی مستورات کوجب بازار سے کوئی سامان منگانے کی ضرورت ہوتی توانہیں کے ذریعہ منگاتی تھیں۔ اسی خدمت کا صلہ ہے کہ: آج اللہ پاک ان سے جو دین کا کام لے رہا ہے، بڑی بڑی ڈگری والے وہ نہیں کر رہے۔
امام ابو یوسف ؒہمیشہ اساتذہ کے لیے دعائے مغفرت کیا کرتے تھے اورفرماتے تھے کہ: میں نے جب بھی کوئی نفل یا فرض نماز پڑھی تو اساتذہ کے لیے ضرور دعا کی۔ (ماخوذ آداب المتعلمین باب چہارم، ص :۲۳۸؍ طبع گلشن نشریات اسلام، کراچی)
کیسے طلبہ سے خدمت لینی چاہیے؟
فرمایا: ہمارے بہت سے اساتذہ طلباء سے خدمت نہیں لیتے تھے اوراپنے ایک اُستاد کا نام لے کرفرمایا کہ: وہ بھی لڑکوں سے کام نہ لیتے تھے لیکن مجھ سے کام لے لیتے تھے اوراصل بات یہ ہے کہ: کام تواُس سے لیا جاتا ہے جو دل سے کام کرے اوراگرکوئی بد دلی سے کام کرے تو ایسے شخص سے کون کام لے گا؟ اورقرائن سے اس کا اندازہ ہو ہی جاتا ہے کہ: کون خوش دلی سے کام کررہا ہے اورکون بد دلی سے؟ اسی لیے میرے استاد ہرطالب علم سے کام نہیں لیتے ہیں؛ بل کہ جس کے متعلق اندازہ ہوتا ہے کہ یہ خوش دلی سے کام کرتا ہے اُسی سے کام لیتے تھے اورفرمایا کہ: زیادہ خدمت بھی نہیں لینی چاہیے، اس سے طبیعت اکتا جاتی ہے اوراب طلبہ کے ایسے مزاج نہیں رہے۔ اولاً توآج کل خدمت کرنے کا مزاج ہی نہیں۔ دوسرا جو لوگ اپنے اُستاد کی یا شیخ کی خدمت کرتے بھی ہیں بہت جلدی وصول کرنا چاہتے ہیں۔ یہ چاہتے ہیں کہ: فوراً ترقی ہو جائے اوراپنے آپ کو بہت بڑا سمجھنے لگتے ہیں اورخیانت بھی خوب کرنے لگتے ہیں۔ مثلاً کھانے کی کوئی چیزہواس میں بھی اُن کی نیت خراب ہو جاتی ہے۔(افادات صدیق: 173-178)