جامعہ اکل کوا کے شعبہ تحفیظ القرآن سے 494خوش نصیب طلبا کاتکمیل حفظِ قرآن کریم
جامعہ اسلامیہ اشاعت العلوم اکل کوا مہاراشٹر میں حسب ِروایت سابقہ، جامعہ کے فعال ترین شعبہ، شعبہٴ تحفیظ القرآن میں امسال قرآنِ کریم حفظ مکمل کرنے والے 494/خوش نصیب طلباکی دوسری مجلس،مورخہ۱۲ /ربیع الثانی ۱۴۴۵ئھ مطابق28 /اکتوبر2023ء بروز سنیچر بوقت صبح بمقام شعبہ حفظ کی عالیشان مسجد میں رئیس جامعہ حضرت مولانا غلام محمد صاحب وستانوی# دامت فیوضہم کی زیرسرپرستی اور ناظم جامعہ حضرت مولانا محمد حذیفہ صاحب وستانوی# حفظہ اللہ کی زیرِ صدارت نیز مہمان ِخصوصی مولانا اقبال صاحب مدنی فلاحی،اورجامعہ کے شعبہٴ حفظ کے اساتذہ اور طلبا کی موجودگی میں منعقد ہوئی۔
تدویرًا تلاوت کلام اللہ سے مجلس کا آغاز ہوا اس کے بعد بارگاہ رسالت میں نعت پاک کا گلدستہ پیش کیا گیا، بعد ازاں 494خوش نصیب طلباکو شعبہٴ اجازہ کے مؤقراستاذشیخ خالد ابراہیم صاحب نے قرآن ِمقدس کی آخری سورت پڑھا کرحاملین قرآن کی مقدس جماعت میں شا مل کیا۔ اس مجلس کی ایک خصوصیت یہ بھی رہی کہ ا س میں 10/ ایسے خوش نصیب طلبا بھی شریک رہے ؛جنہوں نے150/سے کم دنوں میں قرآن کریم کو اپنے سینوں میں محفوظ کرلیا۔اس طرح اس سال شعبہٴ تحفیظ القرآن سے حفظ مکمل کرنے والے حفاظ کی تعداد 549 ہو گئی؛ نیزاب تک جامعہ سے فارغین حفاظ کی تعداد11007اور فروعاتِ جامعہ سے فارغین حفاظ کی تعداد 14578ہوئی،اس طرح جامعہ اور فروعات جامعہ سے فارغین حفاظ کی کل تعداد25585ہوگئی۔فللہ الحمد علی ذالک۔
اس مبارک ومقبول ترین عمل کے بعدناظم جامعہ حضرت مولانا حذیفہ صاحب وستانوی نے حافظ بننے والے طلبا کو قیمتی نصیحتوں سے نوازا، نیز قرآن کریم کے معجز ہونے پر وقیع خطاب فرمایا۔اور اس پر فتن دور میں طلبا کو قرآن ِمقدس سے وابستہ رہنے کی تلقین فرمائی اور تکمیل حفظ پر مبارک بادی پیش کی، نیز قرآن کریم کو سمجھ کر پڑھنے کی ترغیب دی۔ اخیر میں رئیس جامعہ حضرت مولانا غلام محمد صاحب وستانوی دامت فیوضہم نے اس مجلس میں حافظ بننے والے طلبا اور ان کے والدین و اساتذہ کو مبارک بادی پیش کی اور طلبا کو قیمتی نصیحتوں سے نوازا۔اور طلبا کو قرآن کریم کے ساتھ وابسطہ رہنے کی خصوصی تلقین کی۔ اخیر میں اپنی رقت آمیز دعا پر مجلس کا اختتام فرمایا۔
از:شعبہ تحفیظ القرآن الکریم(جامعہ اکل کوا)