حضرت شیخ الحدیث مولاناسید محمد عاقل صاحب نوراللہ مرقدہ کا علمی فیضان اور روحانی ارمغان
از: مفتی محمد سلمان صاحب مظاہری،وانمباڑی
ناظم: مرکزالاقتصاد الاسلامی،انڈیا
اَلْحَمْدُ لِلہِ رَبِّ الْعَالَمِینَ، وَالصَّلَاۃُ وَالسَّلَامُ عَلَی سَیِّدِ الْاَنْبِیَائِ وَالْمُرْسَلِینَ، نَبِیِّنَا مُحَمَّدٍ وَعَلَی آلِهِ وَصَحْبِهِ اَجْمَعِینَ.
قَالَ اللّٰہُ تَعَالٰی فِی کِتَابِهِ الْکَرِیمِ: {وَقَالَ رَبُّکُمُ ادْعُونِی اَسْتَجِبْ لَکُمْ}
اَمَّا بَعْدُ:
علم وعمل اورزہد و تقویٰ کے آسمان پربعض ہستیاں ستاروں کی مانند چمکتی ہیں، جن کی روشنی سے آنے والی نسلیں اپنی راہیں متعین کرتی ہیں، اُن کی حیاتِ مبارکہ اُنہی مقدس علوم کی عملی تفسیر ہوتی ہے، جن کی تعلیم و تدریس میں وہ اپنی عمریں صرف کردیتے ہیں،ایسی ہی ایک آفتابِ علم وعرفان شخصیت، جامعہ مظاہرعلوم سہارنپور کے سابق شیخ الحدیث وناظمِ اعلیٰ، پیکرِعلم وعمل، تقویٰ وطہارت کے کوہِ گراں، اورعاجزی وانکساری کے پیکرِ جمیل، حضرت مولانا سید محمد عاقل صاحب نوراللہ مرقدہ کی تھی۔ آپ کا وجودِ مسعود حدیثِ نبوی کے نور سے اس قدرمنورتھا کہ آپ کی ہرادا سنتِ رسول صلی اللہ علیہ وسلم کی آئینہ دارنظرآتی تھی۔
اس ناچیز کو یہ سعادت نصیب ہوئی کہ حضرت والا کی جوتیوں میں بیٹھ کرعلم کے چند حروف سیکھے، اور یہ میری زندگی کا سب سے قیمتی اثاثہ ہے کہ میں اُن کی پُراثر صحبت کی کیفیت کا گواہ ہوں، وہ صرف حدیث کے استاذ نہیں تھے، بلکہ حدیث اُن کے رگ و پے میں رچ بس گئی تھی، اُن کی پوری زندگی اُنہی نبوی اصولوں کی جیتی جاگتی تصویرتھی، جن کے مطالعہ و تدریس کا مقدس مشغلہ تقریباً چھ دہائیوں پرمحیط رہا، ارشاداتِ نبوی صلی اللہ علیہ وسلم اُن کا اوڑھنا بچھونا تھے، جو اُن کے ہرعمل اورفکرکوایک نورانی قالب میں ڈھالتے تھے، خود نمائی اورشوروغل کے اس دورمیں وہ اخلاص و للہیت کے ایک پرسکون قلعہ تھے، انہوں نے عالیشان اسٹیجوں یا مزین منبروں کو اپنا می
دان نہیں بنایا، بلکہ درسگاہ کے پُر وقار ماحول اور اپنے حجرے کی مبارک تنہائی کو منتخب فرمایا، جہاں انہوں نے ترمذی، ابو داوؤد اور نسائی جیسے حدیث کے عظیم مجموعے پر اپنی علمی تحقیقات اور تشریحات قلمبند کیں،یہی اُن کی دنیا تھی؛ مقدس الفاظ اور گہرے معانی کی دنیا۔
اُن کی شخصیت ایسی دل آویز تھی کہ جس میں ہم آہنگ خوبیاں ایک ساتھ جمع تھیں، وہ بے پناہ ذہانت وفطانت اورحاضرجوابی کے مالک تھے، پھر بھی خود کوکمالِ سادگی اور بے تکلفی سے پیش فرماتے، اُن کے نورانی چہرے پر تقویٰ کے آثار ہرآن نمایاں رہتے، مگر شفقت ونرم خوئی ایسی کہ ہرکوئی اُن سے قرب محسوس کرتا، وہ کم گو تھے، مگر اُن کی پُر معنی خاموشی اکثر طویل خطابات پربھاری ہوتی۔ اپنے طلباء کے لیے اُن کی شفقت ایک باپ کی سی تھی، اپنے ہم عصروں کے لیے اُن کا احترام بے مثال تھا، اوروہ شہرت و جاہ و منصب سے کامل بیزار تھے، اُن کی باوقارچال میں ایک ایسی خاموش خوبصورتی تھی جو ایک مطمئن اورذاکر روح کی عکاسی کرتی تھی۔ بلاشبہ، اُن کے طلباء اور ہم عصراحباب نے اُن کی ذات میں اسلاف کی ایک قیمتی نشانی، ایک حقیقی ’’یادگارِ اسلاف‘‘کا مشاہدہ کیا۔
یہ ہماری خوش قسمتی ہے کہ اِسی شیخِ وقت کے قلمِ مبارک سے ’’بیان الدعاء‘‘ کی شکل میں ایک عظیم علمی وروحانی ارمغان ہم تک پہنچا ہے،یہ کتاب ایک دعائیہ مجموعہ سے کہیں بڑھ کر ہے؛ یہ نبی اکرم صلی اللہ علیہ وسلم کے ارشادات کی صحبت میں گزاری گئی ایک زندگی کا نچوڑ ہے، یہ ایک روحانی دستور العمل، قلوب کے لیے تسکین کا سرچشمہ، اورایک ایسے مومن کے لیے عملی رہنما ہے، جو دعاء کے عظیم عمل کے ذریعے اپنے خالق سے اپنا رشتہ مضبوط کرنا چاہتا ہے۔
اس مضمون کا مقصد ’’بیان الدعاء‘‘ میں موجود علمی وروحانی خزانوں کو کھولنا، اس کے ہر پہلو کا عقیدت بھرا جائزہ لینا، اوریہ ظاہر کرنا ہے کہ یہ کس طرح اپنے عظیم مصنف کی گہری روحانیت اورعلمی جلالت کا عکس ہے۔
بیان الدعاء کی تصنیف کا پس ِمنظر: خلوص و للہیت سے مزین ایک پیش لفظ:
حضرت والا اپنی کتاب کا آغازایک ایسے پیش لفظ سے فرماتے ہیں جوجتنا منور ہے اتنا ہی عاجزانہ ہے، یہ کتاب کی روح اوراس کی تخلیق کے پیچھے کارفرما خلوص نیت کی ایک حسین جھلک پیش کرتا ہے، حضرت شیخ الحدیث نوراللہ مرقدہ ارشاد فرماتے ہیں کہ دعاؤں کا یہ مجموعہ ابتدائی طورپراشاعت کے ارادے سے ترتیب نہیں دیا گیا تھا، یہ اُن کا ذاتی معمول تھا، حدیثِ پاک سے منتخب کردہ وہ دعائیں جنہیں وہ روزانہ اہتمام سے پڑھا کرتے تھے۔
ایک نجی مجموعے سے اُمت کے لیے ایک عام نفع کے چشمے تک کا سفر، پدرانہ شفقت کے ایک سادہ عمل سے شروع ہوا،انہوں نے یہ دعائیں لکھ کراپنے گھر کی مستورات کوعطا فرمائیں اورانہیں باقاعدگی سے پڑھنے کی ترغیب دی، تاہم جلد ہی اُن کے قلبِ صافی پرایک نورانی خیال وارد ہوا: یہ فائدہ صرف میرے گھر کی چاردیواری تک ہی کیوں محدود رہے؟ اس روحانی تحفے کو دوسروں تک پہنچانے، اس میں مزید منتخب دعائیں شامل کرنے، اوراسے شائع کرنے کی خواہش پیدا ہوئی، تاکہ یہ تمام مسلمانوں کے لیے رہنمائی اوربرکت کا ذریعہ بن سکے، وہ اپنی مخصوص انکساری کے ساتھ رقمطراز ہیں کہ جیسے جیسے وہ اضافے کے لیے حدیث کی کتابوں کے بحرِزخار میں غوطہ زن ہوتے گئے، ان دعاؤں کے لیے ان کا اپنا شوق اور قلبی جذبہ فزوں ترہوتا گیا۔
یہ پیش لفظ فی الفور کتاب کے بنیادی اصول: اخلاص، کو قائم کرتا ہے، یہ کسی علمی ناموری کی خواہش سے نہیں، بلکہ ایک ذاتی روحانی مشق اوراُمتِ محمدیہ کو نفع پہنچانے کی سچی تڑپ سے پیدا ہوئی۔
اس کے بعد حضرت شیخ الحدیث نوراللہ مرقدہ نے کمالِ خوبی سے اس اہمیت کو واضح فرمایا ہے، جو نبی اکرم صلی اللہ علیہ وسلم نے دعاء کےعمل کو عطا فرمائی ہے، وہ ارشاد فرماتے ہیں کہ حدیث کے گہرے مطالعے سے یہ حقیقت آشکارہوتی ہے کہ نبی اکرم صلی اللہ علیہ وسلم نے نہ صرف دعاء کو اپنی حیاتِ مبارکہ کا ایک اہم ستون بنایا بلکہ اپنے صحابہ کرام رضوان اللہ علیہم اجمعین کی اس عمل میں نہایت باریک بینی سے رہنمائی بھی فرمائی، آپ صلی اللہ علیہ وسلم اس بات پربھی نظر رکھتے تھے کہ صحابہ کرام کس طرح دعا مانگ رہے ہیں، حضرت والا ایک نہایت بصیرت افروز مثال دیتے ہیں: نبی اکرم صلی اللہ علیہ وسلم نے ایک شخص کو دیکھا جس نے اللہ کی حمد وثنا اورآپ صلی اللہ علیہ وسلم پردرود بھیجے بغیر جلدی میں دعا شروع کردی، آپ صلی اللہ علیہ وسلم نے نہایت نرمی سے اس کی اصلاح فرمائی اورارشاد فرمایا: ’’تو نے جلدی کی‘‘، اس کے برعکس جب آپ صلی اللہ علیہ وسلم نے دوسرے شخص کو حمد و صلوٰۃ کے بہترین آداب کے ساتھ دعا مانگتے دیکھا، توآپ صلی اللہ علیہ وسلم نے اس کے عمل کی تصویب فرمائی اورارشاد فرمایا: ’’اب مانگ، تیری دعا قبول ہوگی‘‘۔
آداب پریہ زورکتاب کےایک مرکزی موضوع کی نشاندہی کرتا ہے: دعاء کوئی عام درخواست نہیں بلکہ عبادت کا ایک گہرا اورمقدس عمل ہے، جس کا اپنا، خدائی طورپرسکھایا گیا طریقہ کار ہے، پیش لفظ میں نبی اکرم صلی اللہ علیہ وسلم کی زندگی کے دیگر ایمان افروز واقعات سے اس نکتے کو مزید تقویت ملتی ہے:
آپ صلی اللہ علیہ وسلم ایک بارایک ایسے شخص کی دعا سننے کے لیے کھڑے ہو گئے، جو بڑی الحاح وزاری سے دعا کررہا تھا اورفرمایا کہ اگر یہ شخص اپنی دعا پر ’’مہر‘‘ لگا دے تو وہ ضرورقبول ہوگی، جب ایک صحابی نے دریافت کیا کہ ’’مہر‘‘ سے کیا مراد ہے، تو آپ صلی اللہ علیہ وسلم نے جواب دیا، ’’آمین‘‘۔ وہ صحابی فوراً اس شخص کے پاس دوڑکرگئے اوراسے یہ عظیم خوشخبری سنائی۔
ایک اور شخص کی دعا سن کر، آپ صلی اللہ علیہ وسلم نے ارشاد فرمایا کہ اس شخص نے اللہ کے ’’اسم اعظم‘‘ کے ساتھ دعا کی ہے، جس کے وسیلے سے مانگی گئی دعائیں قبول ہوتی ہیں۔
آپ صلی اللہ علیہ وسلم نے ایک صحابی، حضرت عمران بن حصین رضی اللہ عنہ کے والد کو ایک طاقتوردعا سکھانے کی پیشکش کی، بشرطیکہ وہ اسلام قبول کرلیں۔ ان کے مشرف بہ اسلام ہونے پر، آپ صلی اللہ علیہ وسلم نے انہیں یہ خوبصورت کلمات سکھائے: ’’اللّٰہُمَّ اَلْہِمْنِی رُشْدِی، وَاَعِذْنِی مِنْ شَرِّ نَفْسِی‘‘ (اے اللہ! میرے دل میں بھلائی کی بات ڈال اورمجھے میرے نفس کے شر سے بچا)۔
آپ صلی اللہ علیہ وسلم نے کمالِ محبت کے ساتھ ایک صحابی کوہرنماز کے بعد پڑھنے کے لیے ایک خاص دعا تعلیم فرمائی، اوران سے تاکیداً فرمایا کہ اسے ہرگزنہ چھوڑنا۔ یہ مقدس امانت پھر استاد سے شاگرد تک نسل درنسل منتقل ہوتی رہی، جو کہ ایک نبوی دعا سے جڑی ہوئی محبت کی ایک نورانی زنجیر ہے۔
ان مثالوں کے ذریعے، حضرت شیخ الحدیث نوراللہ مرقدہ یہ ثابت فرماتے ہیں کہ دعاء ابتدائی مسلم معاشرے میں ایک جیتی جاگتی حقیقت تھی، جس کی رہنمائی اورپرورش خود نبی رحمت صلی اللہ علیہ وسلم نے فرمائی۔
حصہ اول: بنیاد – دعا کی فضیلت اور حقیقت
دعاؤں کو پیش کرنے سے پہلے، حضرت شیخ الحدیث نوراللہ مرقدہ ایک مضبوط نظریاتی اورروحانی بنیاد قائم کرنے کے لیے کافی جگہ وقف فرماتے ہیں۔ وہ دعا کی فضیلت اورسب سے اہم، استغفار کی گہری مشق پرتفصیل سے روشنی ڈالتے ہیں۔
دعا کی فضیلت:
یہ حصہ دوایسی عظیم احادیث سے شروع ہوتا ہے جواسلام میں دعا کی حیثیت کومتعین کرتی ہیں:
(۱)’’الدُّعَائُ ہُوَ الْعِبَادَۃُ‘‘(دعا ہی عبادت ہے)۔
حضرت والا وضاحت فرماتے ہیں کہ علماء نے اس کی تشریح یوں کی ہے کہ دعا کے عمل میں، بندہ اللہ کے سامنے اپنی مکمل عاجزی، محتاجی اور بے بسی کا اظہار کرتا ہے، جبکہ اللہ کی کامل طاقت اورعظمت کا اقرارکرتا ہے۔ یہی اظہارعبادت کی اصل اورحقیقت ہے۔
(۱)’’الدُّعَائُ مُخُ الْعِبَادَۃِ‘‘ (دعا ء عبادت کا مغز ہے)۔
اس سے یہ ظاہرہوتا ہے کہ دعا کوئی ضمنی عمل نہیں بلکہ ایک مومن کی زندگی کا مرکزی اورکلیدی جزو ہے۔
حضرت والا قرآنی احکامات سے اس کی تائید فرماتے ہیں، جیسے اللہ کا براہ راست حکم:
{ادْعُونِی اَسْتَجِبْ لَکُمْ} (مجھ سے دعا مانگو، میں قبول کروں گا)۔
وہ اس حدیث کا بھی حوالہ دیتے ہیں کہ انسان کوقبولیت کے پختہ یقین کے ساتھ دعا کرنی چاہیے، اورخبردار کرتے ہیں کہ اللہ غافل اورلاپرواہ دل سے کی گئی دعا قبول نہیں فرماتا، حضرت شیخ الحدیث نوراللہ مرقدہ یہاں ایک نہایت گہری بصیرت کا اضافہ فرماتے ہیں: ایک غفلت سے پڑھی گئی نماز کسی حد تک قبول ہوسکتی ہے کیونکہ اس کی جسمانی ہیئت رکوع، سجدہ خودعاجزی کا ایک اعلیٰ اظہار ہے، تاہم ایک غفلت سے مانگی گئی دعا، جس میں یہ جسمانی ہیئت نہیں ہوتی، اگردل کی حضوری سے خالی ہوتواس کی قبولیت مشکل ہے؛لہذادعا مکمل توجہ اور سچے خلوص کا تقاضا کرتی ہے۔
ایک اہم نکتہ جس پربات کی گئی ہے وہ ہے’’مومن کا اپنی دعا کی قبولیت میں تاخیر پرردعمل‘‘، حضرت والا مایوسی کے خلاف نصیحت فرماتے ہیں، اورابن ماجہ کی ایک نہایت خوبصورت اور’’نادر‘‘ حدیث بیان کرتے ہیں:
’’ہمارا رب اپنے بندوں کی مایوسی پرہنستا ہے، حالاں کہ اس کی طرف سے عطا قریب ہوتی ہے‘‘۔
جب ایک صحابی نے تعجب سے عرض کیا کہ کیا اللہ تعالیٰ ہنستا ہے؟ تو آپ صلی اللہ علیہ وسلم نے اس کی تصدیق فرمائی، اس پراس صحابی کا جواب گہری حکمت اورامید سے لبریزتھا: ’’ہم ایسے کریم آقاکی بھلائی سے کبھی محروم نہیں رہ سکتے جو ہنستا ہے!‘‘، حضرت والا وضاحت فرماتے ہیں کہ یہاں اللہ کا ہنسنا اس کی بے پناہ رحمت اور شفقت کی علامت ہے، نہ کہ ناراضگی کی، بندے کی بے صبری پرجب کہ کشادگی بالکل دہلیزپرہوتی ہے۔
پھر حضرت والا دعا کی قبولیت کی شرائط پرگفتگو فرماتے ہیں، جن میں سب سے اہم یہ ہے کہ انسان کی روزی حلال ذرائع سے ہو، وہ سنجیدگی سے تبصرہ کرتے ہیں کہ یہ جدید دور میں ایک بہت نازک اوراہم مسئلہ بن گیا ہے، وہ یہ بھی واضح فرماتے ہیں کہ قبولیت کا مطلب ہمیشہ وہی چیز ملنا نہیں جو مانگی گئی ہو، بلکہ اس کی تین صورتیں ہو سکتی ہیں۔
استغفار کی طاقت:
حضرت شیخ الحدیث نوراللہ مرقدہ نے اپنی کتاب کے عملی حصے کا آغاز استغفار کے اس عظیم الشان عمل سے کیا ہے۔ وہ ابوداؤد کی طاقتور حدیث کا حوالہ دے کر شروع فرماتے ہیں:
’’جو شخص استغفارکولازم پکڑے، اللہ اس کے لیے ہر تنگی سے نکلنے کا راستہ بنا دیتا ہے، اورہرغم سے نجات عطا فرماتا ہے، اوراسے ایسی جگہ سے رزق دیتا ہے، جہاں سے اسے گمان بھی نہیں ہوتا‘‘۔
وہ اس قرآنی آیت کو اجاگر کرتے ہیں ،جوامت کے لیے اللہ کے عذاب سے ’’امان‘‘ کے دو ذرائع کی نشاندہی کرتی ہے: نبی اکرم صلی اللہ علیہ وسلم کی موجودگی، اوراستغفار کا عمل۔
نبی اکرم صلی اللہ علیہ وسلم کے وصال کے بعد، استغفارقیامت تک مومنوں کے لیے حفاظت کا ایک دائمی ذریعہ ہے، حضرت والا بتاتے ہیں کہ نبی اکرم صلی اللہ علیہ وسلم خود، معصوم عن الخطا ہونے کے باوجود، دن میں۷۰؍ سے۰۰ ۱؍ مرتبہ اللہ سے مغفرت طلب کرتے تھے، جو ہر مومن کے لیے اس کی بے پناہ اہمیت کو ظاہر کرتا ہے۔
ایک اہم بحث استغفار کی ’’حقیقت‘‘ کے گرد گھومتی ہے، حضرت والا وضاحت فرماتے ہیں کہ یہ محض ’’استغفراللہ‘‘ کی زبانی تکرار نہیں ہے، سچا استغفار اپنے گناہ کے گہرے احساس اوراللہ کے سامنے سچی ندامت اورشرمندگی سے پیدا ہوتا ہے۔
یہ باب سورۂ نوح میں مذکوراستغفار کے متعدد دنیاوی اورروحانی فوائد کی فہرست دیتا ہے، حضرت والا امام حسن بصری کا مشہورواقعہ بیان فرماتے ہیں، جنہوں نے قحط، غربت، اور بے اولادی جیسی مختلف شکایات لے کر آنے والے لوگوں کو استغفار کا ایک ہی بابرکت نسخہ عطا فرمایا۔
یہ حصہ استغفار کے لیے حدیث سے ماخوذ پُراثر کلمات کے مجموعے کے ساتھ ختم ہوتا ہے، جو قاری کو اس اہم عمل کے لیے ایک نبوی نسخہ فراہم کرتا ہے، ان میں سب سے ممتاز سید الاستغفار ہے، حضرت والا صحیح بخاری کی وہ حدیث نقل فرماتے ہیں ،جو اس شخص کے لیے جنت کی عظیم بشارت دیتی ہے جو اسے صبح کے وقت پختہ یقین کے ساتھ پڑھے اور شام سے پہلے وفات پا جائے، یا شام کو پڑھے اور صبح سے پہلے وفات پا جائے۔
حصہ دوم: نبوی دعاوؤں کا نورانی خزانہ:
’’بیان الدعاء‘‘کا قلب وروح اس کے دو اہم ابواب میں پوشیدہ ہے، جو ایک مومن کی زندگی کے لیے سب سے طاقتوراورموزوں دعاؤں کا ایک منتخب گلدستہ پیش کرتے ہیں۔
فصل اول: روزانہ پڑھی جانے والی دعائیں:
یہ باب انسان کے پورے دن کو روحانیت سے معطرکرنے کے لیے ایک کامل رہنما ہے، حضرت مصنف نوراللہ مرقدہ نصیحت فرماتے ہیں کہ دعائیں شروع کرنے سے پہلے، اللہ کی حمد وثنا اورنبی اکرم صلی اللہ علیہ وسلم پردرود و سلام کا نذرانہ پیش کیا جائے۔
یہ باب بڑی خوبصورتی اور باریک بینی سے ترتیب دیا گیا ہے:
صبح و شام کی دعائیں: اس حصے میں بے پناہ فضیلت کی حامل دس دعائیں شامل ہیں۔ ہردعا کے لیے، حضرت والا عربی متن، سلیس ترجمہ، اوراس کی فضیلت پرمبنی حدیث فراہم کرتے ہیں۔
نماز کے بعد کی دعائیں: اس حصے میں ان دعاؤں کا مجموعہ ہے، جو نبی اکرم صلی اللہ علیہ وسلم اورآپ کے صحابہ فرض نمازوں کے بعد پڑھا کرتے تھے۔ اس میں وہ مشہوردعا بھی شامل ہے، جو آپ صلی اللہ علیہ وسلم نے کمالِ محبت سے حضرت معاذ بن جبل رضی اللہ عنہ کو تعلیم فرمائی تھی۔
جامع دعائیں: یہاں حضرت والا کچھ دعائیں جو سب سے زیادہ جامع اورہمہ گیرہیں جمع فرماتے ہیں، ایک بہترین مثال وہ دعا ہے، جوآپ صلی اللہ علیہ وسلم نے اپنی زوجۂ مطہرہ حضرت عائشہ رضی اللہ عنہا کو سکھائی تھی، اور اسے ’’جوامع الدعاء‘‘ قرار دیا تھا۔
مخصوص اعمال کی دعائیں: یہ باب ایک مسلمان کی روز مرہ کے ہراہم عمل، مثلاً گھر میں داخل ہونے اورنکلنے، مسجد جانے، کھانے پینے، اورسونے جاگنے کی دعاوؤں کا احاطہ کرتا ہے۔
فصل دوم: مخصوص حاجات اور مشکلات کے وقت کی دعائیں:
یہ باب ایک روحانی شفاخانے کی حیثیت رکھتا ہے، جوانسان کو درپیش مختلف آزمائشوں اورمصیبتوں کے لیے نبوی علاج پیش کرتا ہے۔ یہ بے پناہ تسکین اورامید کا ذریعہ ہے، جوظاہرکرتا ہے کہ اسلام نے ہرقابلِ تصورصورت حال میں اللہ کی مدد طلب کرنے کے لیے ہماری کامل رہنمائی فرمائی ہے، اس باب میں کسی بھی کام میں آسانی، پریشانی اور بے چینی سے نجات، قرض اورمالی مشکلات کے حل، اوردعائے استخارہ جیسی اہم دعائیں شامل ہیں۔
حصہ سوم: تتمہ -روحانیت کا ایک جامع نقطہ نظر:
’’بیان الدعاء‘‘ صرف دعاؤں کے مجموعے پر ختم نہیں ہوتی، حضرت شیخ الحدیث نوراللہ مرقدہ، ایک سچے روحانی رہنما کی حیثیت سے، کئی ایسے انمول ضمیمے شامل فرماتے ہیں، جواس کتاب کو روحانی فلاح و بہبود کے لیے ایک مکمل دستورالعمل بنا دیتے ہیں۔
تنبیہ (اعمال کی حفاظت پر ایک اہم نوٹ): ایک نہایت گہری بصیرت افروز حصے میں، حضرت والا زبان کے گناہوں، خاص طور پرغیبت، بدگمانی، اورحسد کی ہلاکت خیزی کی طرف توجہ دلاتے ہیں، ایک سچے مربی کی یہی شان ہے کہ وہ صرف نیک اعمال کی ترغیب نہیں دیتے، بلکہ ان اعمال کے نورکو بجھانے والے گناہوں سے بچنے کی تدابیر بھی سکھاتے ہیں۔
فوائد: ’’دوفوائد‘‘شامل کیے گئے ہیں ،جو حضرت والا کی گہری علمی بصیرت اورعملی حکمت کی عکاسی کرتے ہیں۔ ایک میں وہ لا اله الا اللہ کے افضل الذکر اور الحمدللہ کے افضل الدعا ہونے کی نہایت لطیف علمی وضاحت فرماتے ہیں۔ دوسرے میں نمازمیں توجہ کے حصول کے لیے عملی مشورے دیتے ہیں۔
شفاء اورحفاظت کے لیے اعمال: کتاب میں ایک اوربزرگ عالم سے منقول بابرکت اعمال کا ایک حصہ بھی شامل ہے، جس میں آیاتِ شفاء، آیاتِ سحر، اوردیگر حاجات کے لیے مخصوص اعمال شامل ہیں۔
منزل شریف: کتاب کا اختتام ’’منزل‘‘ کے مکمل متن کے ساتھ ہوتا ہے، جو قرآن کی ۳۳؍آیات کا مشہور مجموعہ ہے جسے اسلاف نے جادو، نظر بد، اوردیگر روحانی آفات کے خلاف ایک طاقتور تریاق قرار دیا ہے۔
حاصلِ کلام: ایک متواضع شیخ کا لازوال تحفہ:
’’بیان الدعاء‘‘ ایک ایسی عظیم تصنیف ہے جو صرف حضرت شیخ الحدیث مولانا سیدمحمد عاقل صاحب نوراللہ مرقدہ جیسے جلیل القدرعالمِ ربانی کے قلم سے ہی وجود میں آسکتی تھی، یہ ایک ایسا حسین امتزاج ہے جہاں گہرا حدیثی علم، عملی روحانیت کے دریا میں ڈھل جاتا ہے، دعاؤں کا انتخاب بے مثال، ترتیب منطقی، اور تشریح بصیرت افروز اور دل نشین ہے، ہر صفحہ حضرت والا کی شخصیت اوران کا اخلاص، ان کی عاجزی، اسناد پر ان کی گہری نظر، اور اُمت کو نبی اکرم صلی اللہ علیہ وسلم کی خالص اور مستند تعلیمات سے جوڑنے کی ان کی سچی تڑپ کا آئینہ دار ہے۔
یہ کتاب محض بے سمجھے پڑھی جانے والی دعاؤں کی فہرست نہیں، بلکہ یہ ایک باشعوراور خدا مرکز زندگی کی دعوت ہے، جہاں صبح سے شام تک کا ہرلمحہ ذکر اوردعا کے نور سے منور ہو۔ یہ ہمیں سکھاتی ہے کہ دعا مومن کا سب سے طاقتورہتھیار، اپنے رب سے اس کی سب سے رازدارانہ گفتگو، اوراس کی بندگی کا اصل جوہر ہے۔ کردارکی پاکیزگی اورعبادت میں حضوری کے لیے عملی مشوروں کا شمولیت اسے ایک سادہ دعائیہ کتاب کے مرتبے سے بلند کرکے تزکیۂ نفس کے ایک مکمل دستور العمل تک پہنچا دیتی ہے۔
اس ناچیز کے لیے، جس نے حضرت والا کی جوتیوں میں بیٹھ کرعلم کے چند حروف سیکھے، ’’بیان الدعاء‘‘ کا مطالعہ ایسا ہے جیسے ایک بار پھران کی شفیق اورنرم آواز کانوں میں رس گھول رہی ہو، جو ہمیں حکمت اور شفقت سے رہنمائی فراہم کر رہی ہے، اور ان لوگوں کے لیے جو اس نعمتِ عظمیٰ سے محروم رہے، یہ کتاب ان کا لازوال علمی و روحانی ورثہ ہے، ایک ایسی حیاتِ مبارکہ کا نچوڑ جو خالصتاً علومِ نبوت کے لیے وقف تھی۔ یہ بے پناہ فائدے کا کام، ہدایت کا ایک حقیقی سرچشمہ، اور ہمارے دور کے ایک عظیم شیخ کی جانب سے امتِ مسلمہ کے لیے ایک انمول تحفہ ہے۔
اللہ رب العزت حضرت والا کی قبر کو نور سے بھر دے، اوران کے درجات کو بلند سے بلند تر فرمائے،اوراعلی علیین میں مقام عطا فرمائے، اور ہمیں ان کے چھوڑے ہوئے علمی و روحانی خزانوں سے کماحقہ مستفید ہونے کی توفیق عطا فرمائے۔ آمین یا رب العالمین۔
بندۂ ناچیز،یکے از خدام
محمد سلمان مظاہری، وانمباڑی